افيهات – كل ما هو هام من افيهات الأفلام – الجزء الأول

05/01 16:26

SupeRagel ‏21 ساعة مضت BuzzRamet اضف تعليق 98 زيارة

افيهات الـ افلام بقت جزء من حياتنا اليومية تقريبا، من اول ما اليوم ما بيبدء و نروح الشغل مثلا لحد ما نرجع البيت و لما نتكلم مع اهلنا و اصحابنا معظم الوقت لحد ما نقفل المكالمة مع اي حد في اخر اليوم و داخلين ننمام خلاص. الايام اللي عايشنها دي اصلا بتحصل فيها مواقف كتير مشابهة لمواقف في افلام فيطلع الافيه يتقال تلقائي لوحده كده كأنه جزء أساسي من واقع الموقف و اصله ومؤخراً مابقاش ينفع انه مايتقالش.

بجد بالرغم من انها حاجة بسيطة و صغيرة الا انها مهمة و بتضحك و بتخلي الموقف حتي لو صعب بيبقي اشبه للكوميديا السوداء اللي هو تبقي في موقف تقيل عليك بس كلمتين يخلوك تضحك من قلبك و انت في عز زعلك، احساس مكلكع بس ساعات بيهون علي الواحد، يعني فيلم الناظر صلاح الدين مثلا كان انتاج سنة ٢٠٠٠ بالرغم انه بقاله كده ١٦ سنة بس افيهات الفيلم لسه الناس بتستخدمها لحد النهارده في كلامها ده غير استخدامها في كوميكس السوشيال ميديا، يعتبر من الافلام الاساسية اللي لازم يتعمل بيها كوميكس بشكل مستمر. الفنان علاء ولي الدين الله يرحمه و احمد حلمي و محمد سعد كانوا ثلاثي دمه خفيف في الأداء.

مثلا لقطة فرح اللمبي لما صلاح و عاطف راحوا له و اللمبي كل شوية يسأل صلاح “هو بابا ماجاش معاك ليه يا ابو صلاح هو احنا مش قد المقام ؟” دلوقتي معظم الناس و هي بتتكلم في مختلف المواقف و هي بتسأل عن اي حاجة في اي حاجة:

– اتنين تلاته صحاب قاعدين فواحد يقول هو احنا مش هنحدد خروجة في الويك اند ولا احنا مش قد المقام ؟!

– واحد و خطيبته لسه محددوش معاد فرحهم فيقول لها احنا مش هنتجوز بقي ولا احنا مش قد المقام؟!

– طالب جامعة زهق و نفسه يتخرج يروح داخل علي الفيسبوك يحط صورة اللمبي في اللقطة دي و يكتب في الكابشن “ هو انا مش هتخرج بقي ولا احنا مش قد المقام”.

“زكريا الدرديري مدرس رياضيات و فرنساوي عقبال ما يجيبوا مدرس فرنساوي” الافيه ده تم استخدامه بشكل كبير جدا في كوميكس ساخرة علي السوشيال ميديا في مواقف سياسية و خلال تغيير الفصول لما الجو بيقلب بطريقة مش مفهومة و الناس مش عارفة تلبس صيفي ولا شتوي و لا نص نص. يعني مؤخرا حصل ان في عز الشتا يجي يوم في النص نلاقي الجو حر جامد كأن الصيف خلاص جه بعدين الجو يبرد تاني، فنلاقي بعدها بمافيش كوميك علي الفيسبوك بصورة يوسف عيد في اللقطة دي و مكتوب في الكابشن “فصل الشتا و الصيف لحد ما الصيف يجي”

ليه لقطة تانيه و هم بيتكلموا عن المسابقة اللي كانت بنهم و بين مدرسة البنات و بيسألوا المدرسين، اذا كان الطلبة مستواهم الدراسي كويس و هيفوزوا ولا لا فيوسف عيد قال بمنتهي الثقة “جاهزين وهنفوز” و افيهات كتير جدا جوه الفيلم ده بتليق علي مواقف كتير في حياتنا اليومية و علي احداث كتير في المجتمع المصري.

بعد فيلم الناظر ما حقق نجاح و ناس كتير جدا عجبتها شخصية اللمبي لقينا بعدها بسنتين محمد سعد نزل بطولة مطلقة لأول فيلم ليه “اللمبي” في سنة ٢٠٠٢ و حقق نجاح كبير جدا بردو و لحد النهارده لسه الافيهات بتاعته متداولة جدا بين الناس و علي السوشيال ميديا، لقطة ما كان قاعد محمد سعد مع الفنان الرائع حسن حسني عشان يسمعه عزفه علي الكمان لكن مكنش عاجبه العزف فسقف و قعد يقوله “براڤو يا عم بخ”، دلوقتي اي حد عايز ينهي موضوع او موقف معين بهزار بيقول براڤو يا عم بخ، لقطة ما قرر اللمبي انه يطلع عربية الكبدة و يشغلها و صوت روح باباه المتوفي بدء يتكلم و يوصيه علي الناس كان بيقوله اوعي يابني تغش في البيع ساندوتش الكبدة بنص جنيه و السجق بخمسة و سبعين فرد عليه قاله حاضر يابه و هيمشي فقاله حط بصل كتير و فلفل كتير و حط شوية طماطم لف تاني لصورته و قاله حاضر يابه و لسه هيمشي فقاله ماتنساش النضافه دي اهم حاجة فقوف ورد و هو زهقان و قال “ما تيجي تبيع انت يابه” من ساعتها لما حد يكتر في الكلام في حاجة بيبقي ده الرد و تم اتستخدام فكرة الافيه ده بشكل مختلف.

يقول ايه في المكالمة لعزت ابو عوف فماجد الكدواني قاله : قوله الفلوس معايا فقال الفلوس معايا فقاله و قوله البضاعة كمان معايا فقال و البضاعة كمان معايا فكان لسه الكدواني هيقوله حاجة تانيه يقولها فمكي قاله “ماتاخد تكلمه انت”.

سامووو علييكووو و ده افيه هنتكلم عنه بعدين بقي..